தமிழ்வெளி சேமிப்பு: tamil tamilveli.com politics cinema blog 2009-04-08

'மின்சாரம்' படத்தில் முதலமைச்சராக நடிக்கிறார் விடுதலை சிறுத்தைகள் தலைவர் தொல்.திருமாவளவன். இப்படத்தின் ஆடியோ வெளியீட்டு விழா ராணி சீதை மன்றத்தில் நடந்தது. எலக்ஷன் நேரம் என்பதால் சிறுத்தை கொஞ்சம் தாமதமாகவே வந்தது. அதற்கு முன்பாக திரையிடப்பட்ட பாடல் ஒன்றில் 'விழித்தெழு.. விழித்தெழு...' என்ற பாடல் லேசாக நரம்புகளை சுண்ட, 'யார் எழுதியது?' என்று ஒருவரையருவர் விசாரித்துக் கொண்டார்கள். திருமா மேடைக்கு வந்ததும்தான் தெரிந்தது. இதை எழுதியதே அவர்தான்!

பாடல் உருவான விதத்தை திருமாவே விவரித்தார். 'இந்த படத்தின் தயாரிப்பாளர் தமிழரசன் என்னை நடிக்க சொல்லி தொடர்ந்து வற்புறுத்தி வந்தார். அதுவும் முதலமைச்சர் வேடத்தில். எனக்கு கூச்சமாக இருந்தது. சினிமாவிலும் சரி, அரசியலிலும் சரி, எனக்கு நடிக்க தெரியாது. அதனால்தான் எங்களுக்கான உரிமையை பெறுவதில் கூட இன்னும் முழுமையான இடத்தை எங்களால் அடைய முடியவில்லை. நான் அவரிடம் நடிக்க மறுத்தபோது, ஒரு பாடலாவது எழுதி தாருங்கள் என்றார். அதுதான் இந்த விழித்தெழு... பாடல்'

'என்னால் எழுதவே முடியாதவாறு தொடர்ந்து இயக்கப்பணிகள். என்னை சுற்றி எப்போதும் நூற்றுக்கணக்கானவர்கள் இருந்து கொண்டே இருந்தார்கள். வேறு வழியில்லாமல் வாசலில் ஒரு காரை கொண்டு வந்து நிறுத்திய தமிழரசன், 'காரில் ஏறுங்கள். பயணம் செய்து கொண்டே பாடலை முடித்துவிடலாம்' என்றார். அசோக் நகரிலிருந்து வேளச்சேரிக்கு இரண்டு முறை சென்று வந்த நேரத்தில் எழுதப்பட்ட பாடல் அது. அதில் ஏதாவது வரிகளை மாற்ற வேண்டும் என்றால், என்னிடமே கொடுங்கள். மாற்றித்தருகிறேன். நீங்களே மாற்றிவிடாதீர்கள் என்ற உத்தரவோடு பாடலை கொடுத்தேன். அதில் ஒரு வார்த்தையை கூட மாற்றாமல் அப்படியே இசையமைத்திருக்கிறார் இசையமைப்பாளர் டி.தேவன். அவருக்கு என் வாழ்த்துக்கள்' என்றார்.

முன்னதாக பேசிய தமிழ் திரைப்பட தயாரிப்பாளர்கள் சங்க தலைவர் இராம.நாராயணன், 'நான் இயக்குவதை நிறுத்தி அதிக நாள் ஆகிறது. அண்ணன் திருமா என் படத்திற்கு பாடல் எழுதுகிறார் என்றால் நானும் ஒரு படத்தை இயக்கலாம் என்ற ஆசை வருகிறது' என்றார். திருமா எழுதிய பாடலை தேர்தல் பிரச்சாரத்துக்காக அப்படியே பயன்படுத்தலாம். அதை ஆயிரக்கணக்கில் பிரதியெடுத்து தமிழகம் எங்கும் அனுப்புங்கள் என்று கூடவே ஒரு யோசனையும் சொல்லிவிட்டு அமர்ந்தார்.

அன்னை இல்லத்தின் வாசலை கடக்கவே முடியாதபடி ரசிகர்களின் நெரிசல்! திக்கி திணறிதான் உள்ளே வந்தார்கள் விவிஐபிகள் கூட! அஜீத்தின் புகழ் பாடும் பேனர்களும், கோஷங்களும் ஐம்புலன்களையும் தாக்கியது. இது 'அசல்' படத்துவக்கவிழா.

நடிகர் திலகம் அமரர் சிவாஜிகணேசன், கமலாம்பாள் ஆசியோடு அன்னை இல்லத்தில் நடந்த விழாவில், ரஜினி, வைரமுத்து உள்ளிட்ட ஏராளமானோர் கலந்து கொண்டார்கள். 'இங்கிருந்துதான் வீரபாண்டிய கட்டபொம்மன், பாலும் பழமும், பாசமலர் போன்ற அற்புதமான படங்களின் ஷ§ட்டிங்கிற்கு கிளம்பியிருப்பார் சிவாஜி. அதனால்தான் இது அன்னை இல்லம். இங்கே இந்த படத்தின் துவக்க விழா நடைபெறுவது மிகவும் பொறுத்தமானது' என்றார் கவிப்பேரரசு வைரமுத்து.

'நான் எந்த விழாவுக்கும் எனது மகள் சௌந்தர்யாவுடன் போனதில்லை. நேற்றே சௌந்தர்யாவிடம், 'நாம் அன்னை இல்லத்துக்கு போக வேண்டும். தயாராக இரு' என்றேன். சந்திரமுகி படத்தின் துவக்க விழாவை இங்கேதான் நடத்தினோம். பாபாவின் தோல்விக்கு பிறகு ஒரு வெற்றிப்படம் கொடுக்க வேண்டும் என்ற நிர்பந்தத்தில் இருந்தேன். ஒரு சிறிய இடைவெளிக்கு பிறகு வெற்றியை தர வேண்டும் என்ற நிலையில் இருந்தார் தயாரிப்பாளர் ராம்குமார். அமரர் சிவாஜியின் ஆசிர்வாதம் அந்த படத்தை வெற்றியடைய வைத்தது'.

'அன்று நான் இருந்த மனநிலையில்தான் இருக்கிறார் அஜீத். இங்கே நடக்கும் இந்த துவக்க விழா அவருக்கு நிச்சயம் வெற்றியை தரும்' என்றவர், ஒருகட்டத்தில் 'அசல் நாயகன்' என்று அஜீத்தை பாராட்ட, சந்தோஷத்தில் பூரித்தார் தல!

'உங்கள் அன்புக்கு நான் சரண்' என்று டைமிங்காக நன்றியுரை ஆற்றினார் டைரக்டர் சரண்!

கல்யாணம் என்றதும் தீயை மிதித்துவிட்டதைப் போல பதைக்கிறார் த்ரிஷா. அவ்வளவு கசப்பான சமாச்சாரமா...

"அதுக்கில்ல... மாசத்துல 28 நாள் ஓயாம நடிச்சிக்கிட்டே இருக்கேன். மீதி ரெண்டு நாள்தான் ரெஸ்ட். அவற்றை ஒரு நொடி கூட வீணாக்காமல் என்ஜாய் பண்றேன். வேலை செய்யறது கஷ்டமில்லை. அதையும் அனுபவித்து செய்கிறேன்.

ஆனா கல்யாணம் பண்ணிக்கிட்டு இந்த அற்புதமான சந்தோஷங்களையெல்லாம் இழக்க விரும்பலே. அதனால கல்யாணம் என்கிற ஐடியாவே இப்போதைக்கு இல்லை.. இல்லை... இல்லை..." எனும் த்ரிஷா, இனி ஆண்டுக்கு ஒரு முறை ஒரு மாதம் கட்டாய விடுப்பு எடுக்கப் போகிறாராம்.

எதற்கு?

"சமீபத்தில் 20 நாட்கள் தோழிகளுடன் மீண்டும் ஆஸ்திரேலியாவில் சுற்றுப் பயணம் செய்து விட்டுத் திரும்பினேன். அது மறக்க முடியாத அனுபவம். ஆண்டுக்கு ஒரு தடவை இதுபோல வெளிநாடு சுற்றுப்பயணம் போனா மனசும் உடம்பும் பிரஷ்ஷாயிடுது. உலகம் முழுவதும் இப்படியே சுற்றி பார்த்து விடவேண்டும் என்ற ஆசை உள்ளது..." என்கிறார்.

அனுபவிங்க அனுபவிங்க!

மண்டியா தொகுதியில் காங்கிரஸ் கட்சியின் சார்பில் போட்டியிட முன் வந்துவிட்டார் ரஜினியின் மிக நெருங்கிய நண்பரான நடிகர் அம்பரீஷ். நடிகை ரம்யாவுக்கு சீட் தரப் போவதாக மிரட்டி அவரை போட்டியிட வைத்துள்ளது காங்கிரஸ்.

ஒக்கலிகா (கெளடா) சமூகத்தைச் சேர்ந்தவரான அம்பரீஷ் மண்டியா தொகுதி காங்கிரஸ் எம்பியாக உள்ளார். ஆனால், இம்முறை பாஜகவுக்குத் தாவ நினைத்தார். ஆனால், அவர் போட்ட சில நிபந்தனைகள் ஏற்கப்படவில்லை என்று தெரிகிறது.

இதையடுத்து காங்கிரஸ் சீட் கொடுத்தும் கூட போட்டியிடுவது குறித்து ஏதும் பேசாமல் அமைதி காத்து வந்தார். பாஜகவுடனும் ரகசியமாக பேசி வந்தார். இதனால் மொத்தமுள்ள 28 தொகுதிகளில் 27 தொகுதிகளுக்கு வேட்பாளர்களை அறிவித்துவிட்டு மண்டியாவுக்கு மட்டும் வேட்பாளரை அறிவிக்காமல் காத்திருந்தது காங்கிரஸ்.

இந் நிலையில் நடிகை ரம்யாவை களமிறக்கப் போவதாக காங்கிரஸ் தரப்பு தகவல் பரப்பியது. இவரும் ஒக்கலிகா சமூகத்தைச் சேர்ந்தவரே.

அம்பரீசின் பலமே ஜாதியும் சினிமாவும் தான் என்ற நிலையில் ரம்யா மூலம் அவரது ஜாதி, சினிமா பலத்தை சிதறடிக்கத் தயாரானது காங்கிரஸ். காங்கிரஸ் முன்னாள் முதல்வர் எஸ்.எம்.கிருஷ்ணாவும் ரம்யாவுக்கு சீட் தரலாம் என காங்கிரஸ் மேலிடத்திடம் கூறிவிட்டார்.

மேலும் மண்டியா மாவட்டத்தில் பலமாக உள்ள தேவ கெளடாவின் மதசார்பற்ற ஜனதா தளமும் ரம்யாவை ஆதரித்து அம்பரீசுக்கு பாடம் புகட்ட முன் வந்ததாக தகவல்கள் பரவின.

பாஜக இந்தப் பகுதியில் அவ்வளவாக பலமில்லாத நிலையில் காங்கிரசும் கெளடாவும் இணைந்து தனது கோட்டைக்கே வேட்டு வைக்க தயாராவதை உணர்ந்த அம்பரீஷ் காங்கிரஸ் சார்பில் மண்டியாவில் போட்டியிட ஒப்புக் கொண்டுவிட்டார். அவர் இன்று வேட்பு மனு தாக்கல் செய்கிறார்.

கேரளத்தைச் சேர்ந்த நடிகை சுமலதா தான் அம்பரீசின் மனைவி ஆவார்.